Rhyfeddodau bywyd gwyllt a hwyl i’r teulu cyfan dros hanner tymor ym Mharc Cenedlaethol Arfordir Penfro

Mae pob math o ddigwyddiadau ar y gweill yn ystod yr wythnos, gan gynnwys teithiau cerdded bywyd gwyllt, anturiaethau archeolegol, teithiau môr ladron, a gweithdai celf a chrefft ar thema’r môr. Mae’r wythnos yn addo i fod yn gymysgedd dda o grwydro, o greadigrwydd, ac o ddarganfod.

Bywyd gwyllt sy’n cael ein sylw’r hanner tymor hwn, gyda chyfres o deithiau tywys sy’n rhoi cyfle i ymwelwyr grwydro cilfachau tawel y Parc a gweld uchafbwyntiau’r tymor. Byddwn ni’n dechrau’r wythnos drwy edrych yn fanylach ar un o’n preswylwyr lleiaf a phrysuraf. Gweld Gwenyn: ar 27 Mai, byddwn ni’n mynd ar daith gerdded hamddenol drwy gaeau a gwrychoedd Skrinkle Haven, ac yn rhoi cyngor ar sut i ganfod ac adnabod y pryfed peillio lleol.

Ar ôl iddi dywyllu, byddwn ni’n cynnal dwy daith gerdded a fydd yn rhoi gwedd wahanol ar y Parc. Ar 28 Mai, ymunwch ag Ystlumod Ysblennydd yn Nhyddewi ar daith drwy’r ddinas liw nos. Dyma gyfle arbennig i ddefnyddio teclynnau canfod ystlumod i wrando ar eu galwadau uchel yn adleisio drwy’r Gadeirlan a Llys yr Esgob. Y noson ganlynol, bydd Taith Gerdded Ystlumod yn cael ei chynnal yng Nghaeriw. Dyma gyfle unigryw i grwydro’r Castell ar ôl iddi nosi, a gweld y rhywogaeth a warchodir o fewn waliau hynafol y castell gyda’ch llygaid eich hun.

I’r rhai ohonoch sydd eisiau mynd ar antur yng ngolau’r dydd, bydd y daith gerdded drwy’r Blodau Gwyllt yn ne Aberllydan ar 29 Mai yn gyfle da i fynd ar daith fwy hamddenol a chael edrych yn fanylach ar y blodau sy’n tyfu ar hyd yr arfordir.  Bydd y daith hamddenol hon yn cael ei chynnal yn y bore, dan arweiniad tywysydd arbenigol a fydd yn tynnu sylw at sut y gellir defnyddio rhai o flodau gwyllt amlycaf y parc mewn bwyd ac mewn meddyginiaeth.

Mae hanes amrywiol y Parc hefyd yn cael sylw yn ein rhaglen ar gyfer yr hanner tymor. Ym Mhorthmawr ar 27 Mai bydd Taith Gerdded Drwy Amser yn cael ei harwain gan un o Barcmyn y Parc ac Archeolegydd Cymunedol Awdurdod y Parc, a bydd hi’n cynnwys archeoleg, hanes, bywyd gwyllt a daeareg. Mae’r daith gerdded hon yn gyfle i archwilio ac ymgolli yn straeon cudd y dirwedd, ac i weld sut mae’r rhan unigryw hwn o’r arfordir wedi ei siapio gan amser, llanw, a phobl.

Yn Oriel y Parc, Canolfan Ddarganfod y Parc Cenedlaethol, bydd y thema arfordirol yn parhau yn rhaglen yr hanner tymor, ond y tro hwn mae elfen greadigol i’r digwyddiadau. Rhwng dydd Sadwrn 24 Mai a dydd Sul 1 Mehefin, bydd teuluoedd yn cael cymryd rhan yn Helfa Drysor y Môr Ladron ar dir Oriel y Parc. Yn ystod yr helfa byddwch chi’n cael cyfle i weld y pentiroedd o amgylch yr oriel wrth chwilio am gliwiau a thrysor sydd wedi eu cario i’r lan. Bydd Gweithdy Gwnewch ac Ewch Tlysau Môr, yn cael ei gynnal ddydd Mercher 28 Mai a bydd pob un o’r mynychwyr yn cael cyfle i greu eu trysorau arfordirol eu hunain. Yna, ar 31 Mai, bydd Marchnad Grefftau mis Mai yn dychwelyd gyda phob math o stondinau unigryw a fydd yn gwerthu nwyddau wedi’u gwneud â sgil, gofal, a chreadigrwydd. Pa ffordd well o gloi’r wythnos?

I weld holl fanylion y digwyddiad, ac i drefnu eich ymweliad, ewch i: www.orielyparc.co.uk neu https://www.arfordirpenfro.cymru/digwyddiadau.

Mae amrywiaeth o deithiau cerdded â golygfeydd godidog ar gael yma i’r rhai sy’n awyddus i grwydro rhagor o’r ardal: www.arfordirpenfro.cymru/pethau-iw-gwneud/cerdded-yn-y-parc/teithiau-gwe/.

Mae offer cymorth symudedd fel cadeiriau olwyn, ar gael mewn sawl lleoliad yn y Parc. I gael rhagor o wybodaeth ewch i https://www.arfordirpenfro.cymru/pethau-iw-gwneud/mynediad-i-bawb/cadeiriau-olwyn-y-traethau/.