Lansio rhaglen lawn antur a chyffro yng Nghastell Caeriw dros y Pasg

Mae Castell Caeriw, sydd wedi’i leoli ar estyniad llanw ac yn cael ei reoli gan Barc Cenedlaethol Arfordir Penfro yn un o safleoedd hanesyddol mwyaf trawiadol Sir Benfro. Mae’n gartref i ddrysfa o dyrau, corneli a thramwyfeydd sy’n berffaith ar gyfer anturiaethau’r Pasg.

Bydd yr Helfa Fawr Wyau Aur newydd yn troi’r Castell yn faes chwarae llawn cliwiau cudd dros wyliau’r ysgol, a bydd y plant yn cael chwilio drwy’r llwybrau troellog a’r corneli annisgwyl am yr wyau aur cyn cael eu gwobr. Bydd yr helfa yn cael ei chynnal yn ddyddiol rhwng 10am a 4pm drwy gydol gwyliau’r Pasg. Mae’n costio £2.50 y plentyn, ar ben y pris mynediad arferol.

Bob bore rhwng 10.30am a 11.30am, rhwng dydd Llun 30 Mawrth a dydd Sul 12 Ebrill, bydd sesiynau Arfau ac Arfwisgoedd ymarferol yn dod â fflach o ddur i Gastell Caeriw, wrth i blant gael cyfle i wisgo arfwisg, codi tarian a chleddyf hir, a rhoi cynnig ar chwarae gyda chleddyf. Mae’r sesiynau galw heibio hyn yn cael eu cynnwys am ddim yn y pris mynediad arferol.

Bydd yr helfa drysor boblogaidd Dewch o hyd i’r Allwedd! yn dychwelyd y Pasg hwn, gan roi cyfle i anturwyr bach chwilio am yr allwedd i agor y gist drysor. Bydd yr helfa yn dechrau am 3pm o borthdy’r Castell rhwng dydd Llun 30 Mawrth a dydd Sadwrn 12 Ebrill, ac eithrio dyddiau Mawrth, a bydd gwobr i bwy bynnag fydd yn canfod yr allwedd.

Bydd sesiynau Gwneud Crefftau Hudolus gyda Whimsical Wildlings yn dod â hud a lliw i is-grofft atmosfferig Castell Caeriw ddydd Mawrth 14 Ebrill, dydd Mercher 15 Ebrill a dydd Iau 16 Ebrill rhwng 10:30am a 2pm. Bydd y sesiynau galw heibio, sydd wedi’u hysbrydoli gan hanesion marchogion, tywysogesau a chyrchoedd mewn cestyll yn gyfle i blant addurno coron, cleddyf, baner, drych a tharian.

Bydd y Castell yn croesawu Storymaster’s Quests: Tŵr y Gwaaaaaaaaaae! am 1pm ddydd Mercher 1 Ebrill, dydd Iau 2 Ebrill, dydd Mercher 8 Ebrill, dydd Iau 9 Ebrill a dydd Gwener 10 Ebrill. Mae’r profiad aml-gyfrwng byw hwn, sydd wedi’i greu gan Oliver McNeil, awdur a dylunydd gemau enwog, yn rhoi’r cyfle i’r gynulleidfa reoli tynged yr arwr maen nhw’n ei greu, drwy ei anfon i fyd llawn dreigiau, trapiau, trysor a digwyddiadau annisgwyl.

I’r rhai sy’n hoff o wyddoniaeth, bydd Wild Science with Wildspace yn cynnal sesiynau darganfod ymarferol yng Nghastell Caeriw ddydd Llun 30 Mawrth, 4 Ebrill, 5 Ebrill a 12 Ebrill. Mae’r sesiynau’n cynnwys Rhyfeddodau’r Môr, Fforwyr Ffosiliau, Pelenni Tylluanod, Creu Blychau Nythu a Thaith Adar i Ddechreuwyr, ac maent yn cyfuno dysgu awyr agored â gwefr archwilio.

Ond efallai mai’r prif atyniad dros wyliau’r Pasg yw’r digwyddiadau Lansio’r Fagnell Enfawr a gynhelir ddydd Mawrth 31 Mawrth a dydd Mawrth 7 Ebrill am 2.30pm. Dyma gyfle i ymwelwyr weld y peiriant gwarchae canoloesol nerthol ar waith.

Dywedodd Daisy Hughes, Rheolwr Castell Caeriw: “Mae Caeriw yn lle anhygoel drwy gydol y flwyddyn, ond mae’r Pasg bob amser yn gyfle da i ni ddangos mor arbennig yw’r lle. Mae’n werth ymweld er mwyn cymryd rhan yn y sesiynau Arfau ac Arfwisgoedd newydd – mae bob amser yn braf gweld y wefr ar wyneb plentyn wrth iddo godi cleddyf canoloesol am y tro cyntaf.”

I gael manylion llawn y digwyddiadau a gynhelir gan Gastell Caeriw yn ystod y flwyddyn, ewch i www.castellcaeriw.com.