Hanes, helfa ac anturiaethau yng Nghastell Caeriw yr hanner tymor hwn

Mae’r rhaglen yn cynnig digon o ffyrdd o archwilio hanes a thiroedd y Castell mewn ffyrdd hwyliog a chofiadwy, gan gynnwys helfeydd trysor, gwersylloedd canoloesol, perlysiau, ystlumod a pheiriannau gwarchae.

Mae Cyrch y Teithiwr Amser yn rhedeg bob dydd drwy gydol y gwyliau ac yn gwahodd ymwelwyr i gamu i’r gorffennol ar helfa drysor hunan-arweiniol drwy’r oesoedd. Gan ddefnyddio ffôn clyfar, gall teuluoedd deithio o’r Oes Haearn i’r Oesoedd Canol ac Oes Elisabeth, a hyd yn oed i’r Ail Ryfel Byd, gan ddatgelu cyfrinachau sydd wedi’u cuddio o fewn muriau’r Castell. Mae’r gweithgaredd yn costio £2.50 y plentyn, a chodir y tâl mynediad arferol.

Rhwng dydd Sul 24 a dydd Mawrth 26 Mai, bydd digwyddiad trawiadol               Bowlore: Chwedlau Bwa a Llafn yn dychwelyd gyda’i wersyll canoloesol. Bydd ymladd â chleddyfau dychrynllyd, saethyddiaeth anhygoel ac arddangosfeydd arfwisgoedd yn dod i dir y Castell. Gall ymwelwyr gymryd rhan yn yr Ysgol Gleddyfau, Rhoi Cynnig ar Fwa Saeth a thrin arfau canoloesol go iawn. Pris mynediad arferol, gyda ffi arian parod fechan am gymryd rhan mewn rhai gweithgareddau.

Prynhawn dydd Mercher 27 Mai am 2.30pm, gall ymwelwyr weld un o arddangosiadau mwyaf dramatig a phoblogaidd y Castell, sef y Trebuchet Enfawr yn cael ei thanio. Roedd y catapwlt canoloesol enfawr hwn yn arfer taflu cerrig at waliau caerog gyda grym dinistriol, a bydd ymwelwyr yn cael cipolwg diddorol ar bŵer a dyfeisgarwch rhyfel gwarchae canoloesol.

Yn ddiweddarach y noson honno, bydd Castell Caeriw yn cynnal Taith Gerdded Ystlumod gyda’r Nos am 8.45pm, gan roi cyfle i ymwelwyr ddarganfod y bywyd gwyllt cudd sy’n dod i’r amlwg ar ôl iddi dywyllu. Bydd y daith, sy’n cael ei harwain gan dywysydd arbenigol ac sy’n defnyddio teclynnau canfod ystlumod, yn archwilio pam mae tir y Castell yn hafan mor bwysig i ystlumod. Mae tocynnau ar gael am £10 y pen. Mae’n hanfodol archebu ymlaen llaw gan fod lleoedd yn brin. Gallwch archebu yma:
https://events.pembrokeshirecoast.wales/#category_1

I blant sy’n mwynhau natur a chrefftau, cynhelir Hwre i Berlysiau! prynhawn dydd Iau 28 a phrynhawn dydd Gwener 29 Mai rhwng 2.30pm a 3.30pm. Gall teuluoedd fwynhau taith fer o amgylch y gwelyau perlysiau cyn casglu cynhwysion i wneud past dannedd, te balm lemon a chreu tusw bach traddodiadol. Mae’r gweithgaredd am ddim gyda thocyn mynediad arferol i’r Castell.

Mae mwy o hwyl ymarferol ar 28 a 29 Mai, gyda sesiynau galw heibio Arfau ac Arfwisgoedd rhwng 10.30am a 11.30am, lle gall ymwelwyr wisgo arfwisg, codi tarian frwydr a chleddyf hir, a dysgu rhai symudiadau ymladd â chleddyfau. Yn ddiweddarach yn y dydd am 3pm, gall teuluoedd ymuno â digwyddiad Canfod yr Allwedd!, helfa drysor gyffrous i chwilio am yr allwedd a fydd yn agor y gist drysor. Mae’r ddau weithgaredd yn rhad ac am ddim gyda mynediad arferol.

Daw’r rhaglen hanner tymor i ben ar nodyn creadigol ddydd Sadwrn 30 Mai, pan fydd Crefftau Hudolus gyda Whimsical Wildlings yn dod â hud i is-grofft atmosfferig y Castell. Gall y plant addurno eu coronau, cleddyfau, baneri, drychau a thariannau eu hunain i fynd adref gyda nhw, gyda’r prisiau’n dechrau o £2 yr eitem. Does dim angen archebu lle.

Dywedodd Daisy Hughes, Rheolwr Castell a Melin Heli Caeriw: “Mae cymysgedd gwych o weithgareddau yng Nghastell Caeriw dros yr hanner tymor hwn, yn cynnwys hwyl ganoloesol, anturiaethau teuluol, profiadau ym myd natur a chrefftau creadigol. Mae’n gyfle gwych i deuluoedd fwynhau amser gyda’i gilydd, crwydro’r Castell a darganfod rhywbeth newydd.”

Mae Castell Caeriw yn cau’n gynnar ddydd Sadwrn 23 Mai ar gyfer priodas breifat. Felly, mae mynediad olaf i ymwelwyr am 1pm a bydd y Castell yn cau am 1.30pm. Bydd Melin Heli Caeriw, y Siop Anrhegion ac Ystafell De Nest yn aros ar agor fel arfer.

Bydd Ystafell De Nest hefyd ar agor yn ystod gwyliau hanner tymor yn gweini cinio ysgafn, cacennau cartref a choffi Masnach Deg gwych.

Hyn a hyn o leoedd sydd ar gael ar gyfer rhai digwyddiadau neu mae’n rhaid cadw lle ymlaen llaw. Mae rhagor o wybodaeth am yr holl ddigwyddiadau hyn ar gael yn https://www.arfordirpenfro.cymru/digwyddiadau.